四國自駕遊

以前去過四國兩次, 都是由本州坐火車或駕車經過誇海大橋來, 這次坐香港快運直達高松, 可以全程在四國.

四國第一天, 住在丸亀町壱番街旁邊的Daiwa Roynet酒店.

晚上在鳥メロ食串燒, ￥150一串, 廣島生蠔￥499, 雞刺身￥699, 啤酒￥199, 抵食, 有機會可以再幫襯.

住在步行街旁邊真是非常方便, 行兩三分鐘便可以食碗面作宵夜.

第二天早上在南咖啡館飲咖啡, 食件多土, 兩個人￥920, 好靚啲咖啡, 超值.

下一站是觀光, 去米芝連三星景區, 栗林公園.

遊完公園,  去附近的Youme Mall行吓;

再去烏冬百選之一, 竹清食烏冬, 雖然這家名店遠離商店街, 但經常人頭湧湧, 一時半已賣哂天婦羅蝦, 只剩獅子狗和天婦羅蛋,

特色是要自己動手去煮面, 其實只是放入罩厘在滾水淥十秒, 再加湯, 烏冬面質好彈牙, 正.

跟着去步行街, 目的是在三時去到Gram食每天限定供應的三層Pancake, 好正, 值得推薦.

食完嘢, 去香川人氣景點父母濱, 日本版的天空之鏡, 因為要配合日落和潮退的時間, 不是每一天都有倒影效果, 我們時間剛好.

這晚住花樹海酒店, 可算是高松最高檔, 屋頂上的大浴池可以從高角度睇晒高松市.

第三天 去金刀比羅宮, 如果由表參道上去, 要走千四級上山路, 體力要求不低, 自己開車, 可以去到神樁的停車場, 百多級已可達御本宮.

既然省了一半路程, 當然要去到最高點, 奧社,

下一站是食香川名物, 田中屋的骨付鳥, 其實是炸雞肶, 不過不失,

然後開車直去高知, 入住步行街的高知Richmond酒店.

晚上去知名的弘人市場, 這個美食廣場是遊客必到, 第一件事是要搵位坐低, 然後逐個攤檔去買刺身, 寿司, 關東煮等.

刺身, 當然是明神丸的鰹刺身, 即場用稻草燒的新鮮鰹魚, ￥1200一客十片, 非常好食, 要添食多一客.

宵夜在藏木食碗沾面, 亦不錯.

第四天 第一個行程是去高知駅睇面包超人廣場, 因為廣場是在站裏面, 要買張車飛才可入內睇.

這行程會參觀三個日本重要文化遺產的天守閣, 第一站是高知城.

跟着開車去四萬十, 四萬十川是名水百選之一, 因為水質靚, 天然河鰻是當然必食;

喺四萬十屋食, 鰻重￥4400, 原來天然鰻是比較瘦身, 肉質較有口感, 來到這裏, 一定不要錯過.

下一站是四萬十川的特色, 沉下橋, 因為四萬十川是沒有水庫, 上游水流急時,  整條橋會被淹沒, 所以有此名, 橋身比較窄, 只可容一車通過, 雖然有微雨, 視野還可以, 決定開車走一轉.

驚險過後, 下一個景點是四國的最南端, 足摺岬.

晚上返回四萬十市, 食四萬十牛燒肉, 三個人食到飽飽, 連啤酒, 唔使￥10,000, 抵食, 讚.

這晚住Sunriver 酒店.

第五天 食完早餐, 在酒店旁的四万十物產館買啲地道清酒和咖啡.

下一站是南樂園, 是去宇和島的中途站, 無甚祈望, 只是到此一遊.

中午去宇和島食迴轉寿司, 這家寿司店算熱鬧, 等位差不多半小時,

大大件和牛寿司￥600, 鮪七點￥1200, 唔怪得咁多人幫襯, 可以推介.

食完, 去第二個天守閣, 宇和島城, 這天守比高知城細, 可以好快睇完, 雨突然轉大, 要怱怱下山, 然後開車去松山.

住喺大街道步行街旁邊的Daiwa Roynet; 因為是星期日, 原來計劃去的本土料理五志喜已滿座, 唯有揾間居酒屋食.

這間花火釜酒屋主打是食釜飯, 好似在其他城市未見過, 亂打亂撞, 都算可以.

最後一天, 還要去參觀第三間天守, 丸亀城.

最後一站是購物, 去高松Aeon Mall, 中午在雙葉食炸豬排定食, 然後回高松機場還車, 結束這次四國之旅.

結語: 這次開車走了四國大半個圈, 去了三間天守閣, 又去埋金刀比羅宮, 足摺岬, 食過最好的四萬十天然鰻, 高知鰹刺身; 最驚喜是趕及去天空之鏡, 影咗張靚相.

2019年9月