福建 福州遊

福州, 福建省省會, 並不是旅遊熱門城市, 與厦門的知名道相距很遠.

這次到訪福州, 景點期望不高, 重點是食吓中國八大菜系之一的閔菜和福建客家菜, 還可以打場高爾夫.

乘港龍早機, 一個半小時便到長樂機場, 但機場離市區頗遠, 乘滴滴快車, 連路費要兩百元才到三迪希爾頓.

中午在酒店中餐廳食福州特色的魚丸, 肉燕, 福州炒面綫, 加埋炸蝦, 算不錯.

食完午餐, 去第一個景點, 福建博物館, 叫得做省級博物館, 理應是內容豐富, 藏品較多, 結果是落差很大, 有啲失望.

下一站是福州西湖, 比杭州西湖, 真是小巫見大巫, 只可算是市民公園, 做吓晨運, 跑吓步, 到此一遊便算.

開始有小雨, 打車去萬象城, 滿以為這萬象城也是華潤的萬象城, 又跌眼鏡, 基本上只有一間天虹百貨公司, 不去也罷; 這個區域唯一人氣較高是家樂福超市, 可以買啲福州特產燕皮.

最驚喜反而是晚上在八合里海記食牛肉火鍋, 剛巧是它們兩周年特價, 兩個人食了五碟牛肉, 一碟牛丸, 兩碟菜, 只要百四元, 超抵食.

第二天早上在新東陽高爾夫打場波, 六百元包球車, 球僮, 非常合理的價錢; 前九的玉蘭區狀態較佳, 後九的棕櫚區果嶺一般, 球僮說會有大動作的維護, 可能以後會好啲.

中午去東百中心, 頂層是美食廣場, 很多名店都在此開了分店, 選擇食麥大叔的鴨肉手工米粉, 白切鴨, 客家豆付, 加埋老福州的大魚丸.

下一站是參觀林則徐紀念館, 介紹林則徐的歷史, 虎門燒鴉片和及後的鴉片戰爭, 導致割讓香港給英國政府; 這個館亦扮演了一個禁毒宣傳的角色, 值得花時間去睇下.

在紀念館門前, 可以試下食同利老舖的肉燕或者買些燕皮, 燕絲作為手信.

跟着去三坊七巷, 這是遊客必到的景點.

穿過南後街, 是美食街, 全部都是街頭小食, 最適合是喜歡掃街的人.

然後打車回希爾頓, 取回行李, 轉去剛開業的泰禾鉑爾曼, 因為是在落班的時間, 塞車很厲害, 七八公里的路程要走四十分鐘.

晚上去老福州徐記 (廣達店) 食閔菜, 食佛跳牆, 荔枝肉, 南煎肝, 芋泥等傳統福建菜; 南煎肝做得不錯, 可以推薦.

第三天在酒店食完早餐後, 去鼓山旅遊, 大熱天時, 如果沒有索道, 我們肯定走人, 坐索道都要二十五分鐘, 如果徒步, 兩個小時都唔會行到.

到了索道上站, 第一個景點是湧泉寺.

第二站是鼓山十八景, 景點基本上已失修, 路標亦不清晰, 可以不去.

中午回東二環泰禾廣場的西貝食碗莜面和牛大骨

晚上去了上下杭的新悦Cindy餐廳食本幫福建菜客家菜, 主要是食河田雞, 鹽酒煮, 算是外省做得最好的雞; 蚵仔煎亦做得唔錯; 一間值得推薦的餐廳.

食完飯, 在上下杭逛一逛.

第四天去森林公園行山, 其實是去福州的新景點, 福道, 一條十幾公里的鋼架棧道, 得過很多國際建築及環保大奬, 雖然很熱, 但是值得一去.

中午在鉑爾曼的潮品食素佛跳牆和白切雞, 可接受,醉排骨則麻麻哋, 服務亦不見好, 不值幫襯.

離開福州前, 喺泰禾新天地的鹿豆咖啡工坊飲杯虹吸的巴拿馬咖啡; 以此結束福州之旅.

結語 : 福州在大興土木, 建多條地鐵, 上下班時間交通阻塞嚴重, 浪費時間, 再過三兩年, 地鐵覆蓋多啲, 又會變成另一個景像.