有馬溫泉, 淡路島自駕遊

這次自駕遊行程比較短, 由大阪出發, 停奈良, 再去有馬溫泉, 最後一站是淡路島州本市, 再回關西機場, 全部車程不需四百公里.

坐中午機, 下午五時抵達關西機場, 乘南海電鐵到難波, 轉地鐵至心齋橋, 車費￥1000, 入住Vessel Inn, 一間很新的酒店, 近車站, 購物食嘢都方便, ￥9000一晚算合理.

Check in 後, 要醫肚, 去心齋橋的座銀, 食濃雞湯拉面, 這面店不大, 座位只有十二個, 據稱經常都要排隊, 我們到達時已是晚上八時, 並非食拉面的高峰時間, 只等了三分鐘便有位;

這拉面的白湯好正, 雞肉嫩滑, 面條亦很熱, 在寒冷天氣時食覺得特別舒服, 原來秘訣是將湯碗的底部放在煮面的熱水上, 令碗底保持較高溫度, 讚.

跟着是購物時間, 宵夜在鳥貴族食雞串, 這家店營業到早上五時, 可以隨時去食.

第二天早上去木津朝市, 飲杯咖啡, 食件蛋治.

然後去睇下有冇好的水果, 去水果店買嘢全部都是遊客, 港人佔多數, 都是買士多啤梨為主, 香港超市賣HK$120一合的福岡品種只賣￥1000, 所以好多人買回港作手信, 我們只買一合, 足夠在當地食.

中午轉到Grand Front Osaka (GFO), 在喜助食牛脷定食, 不過不失, 在大商場內的食肆不可要求過高.

下午茶在一間樓上舖 Café&Sweets Bar Better食Pancake, 飲咖啡, Pancake做得不錯, 又唔貴; 這酒吧營業到零晨三時, 主要做夜鬼生意, 所以下午茶是我們二人包場.

食晚餐前去了難波的Honma Outlet執平貨, Golf鞋賣￥3800, 折合港幣不到三百, 淘宝都冇咁平.

自從在東京食過俺の割烹, 便對 ’俺の’ 品牌有信心, 這次在大阪, 試下它的法國意大利菜; 大大碟火腿賣￥780, 羊仔肉￥1580, 認真抵食.

第三天早上去了遊客常去的黑門市場, 感覺真是一般, 賣的士多啤梨亦比木津市場貴百分之十, 所以港客都比較少, 反而泰國客較多.

中午在心齋橋的宮崎の地雞車食燒雞, 雞肉很韌, 咬不開, 與我們在宮崎食的不一樣, 服務員最後只給了一個折扣, 是我們在日本食嘢最差的一間, 以後都不會幫襯.

下一站是租車開去奈良, 不用一個小時便到奈良駅的AB酒店, ￥7100一晚, 很實惠; 天還未黑, 去行吓奈良的商店街, 與心齋橋比, 是大巫見小巫, 只有怱怱行吓便算.

晚上去かき小屋食蠔, 這店主打是食蠔放題, ￥2980任食燒蠔, 所以客人都是日本年輕人, 只要食到十二隻便有賺, 我們選擇了食不同煮法的蠔, 生蠔, 蒸蠔, 炸蠔和燒蠔, 更可食埋燒蝦, 帆立貝和蟹殼.

第四天是旅遊時間, 以前來過奈良多次, 每次都是坐火車, 去奈良公園餵鹿, 其他地方都未去過, 這次住一晚, 可以去下春日大社和東大寺.

中午去奈良名店志津香食釜飯, 蟹肉釜飯￥1560, 美味, 竟然可以在中午食這麼多飯, 連飯焦都食埋.

下一站是去平城宮遺址, 這是日本皇朝一千三百年前的皇宮, 現已成為考古的重要地方, 朱雀門和大極殿已重建, 因為忽然下大雨, 只能在室內參觀, 便以此結束奈良之行.

開車個半小時去有馬溫泉, 住一間有七百年歷史的兵衛 向陽閣, 一泊二食要￥35000, 這酒店是一房難求, 通常都要一個月前訂房, 主因是有馬溫泉近大阪及神户, 已被開發為旅遊區幾十年, 所以收費貴啲都有大把人冒名而去.

老實說, 這家酒店的房間, 溫泉, 自助晚餐和服務水平均很高, 值得推薦.

第五天離開有馬, 開車去淡路島, 第一站是淡路島SA, 可以見到整條明石大橋, 又可以買啲淡路島特產, 洋蔥.

下一站是去夢舞台和明石海峽公園, 因為天氣還是冷, 未到開花季節, 只能在植物館內看花.

行完公園, 去淡路島牧場食淡路島牛BBQ, 天氣冷，未是旅遊季節，感覺冷清, 食完速離開.

去酒店前, 先去產直市場 美菜戀來屋, 買啲當地蔬菜, 還有淡路島士多啤梨, 更可買產量很小的淡路島牛.

買完嘢, 去洲本的島花酒店, 這家酒店設計比較新, 並沒有傳統的大浴場和溫泉, 但客人可以利用它的相關酒店的溫泉, 六時半前有小艇送人客到對岸的溫泉, 六時半後變為用專車接送, 服務周到.

這晚是此旅程最精采的一餐, 食淡路島河豚全餐, 餐廳是洲本市的海山海鮮料理, 主廚告訴我們, 他是第一次接待外國遊客.

一條1.4公斤的河豚做十二道菜, 有前菜, 湯, 天婦羅, 寿司, 火鍋, 雜炊等等, 最特別是燒白子, 亦是全條魚最名貴的一部分.

第六天食完早餐, 開兩個小時車去泉南Aeon Mall, 買啲嘢, 中午喺泉佐野寿司郎食餐寿司, 然後去機場, 結束這次美食之旅.

結語: 大阪的中國遊客太多, 日本人亦分不出那個是大陸, 那個是台灣, 那個是香港, 總覺得中國人都會帶來麻煩, 有點歧視的態度, 反而去到日本的小城鎮, 當地人的英語水平雖然較低, 但友善很多; 這次旅程最難忘都是在小料理餐館食淡路島河豚, 下次經過淡路島, 會再幫襯.

2018年3月